skip to Main Content

Святыня Ватопедского монастыря

Святая Гора Афон. Удел Пресвятой Богородицы. Православная твердыня и место паломничества людей со всего света.
Паломники, бывшие на Афоне, единодушны в своих воспоминаниях — покидать Святую Гору можно только со слезами на глазах, как будто оставляешь лучший мир, преддверие Неба. И хочется возвратиться вновь на это святое место, отрешившись от суеты и мирских забот.
И как ручейки воды берут свое начало от живительного источника, так разносятся по свету частички афонской благодати. Одной из них милостью Божией стал и наш храм.
Под красивой золотой сенью в северной части храма находится его главная чтимая святыня – икона Богородицы «Отрада или Утешение»

 

 

Икона эта написана на Афоне по благословению святейшего патриарха Алексия II специально для нашего храма и является списком с чудотворного образа, находящегося в монастыре Ватопед. История монастыря насчитывает более десяти веков. Интересно происхождение названия обители. По преданию, в конце IV века сын императора Феодосия Великого Аркадий, будучи ещё отроком, совершал морское путешествие. Погода на море переменчива, и путешественники были застигнуты бурей. Мощная волна обрушилась на корабль и смыла мальчика за борт. Придворные страшно испугались за жизнь своего господина! Как только буря утихла, они принялись искать отрока. Команда прочесывала прибрежные заросли в надежде найти хотя бы тело. К счастью, мальчик нашелся живым и невредимым. Все это время он мирно спал под прибрежным кустом. Оказалось, что в последний момент Аркадий в отчаянии взмолился к Пресвятой Богородице, и Она услышала и спасла его. В благодарность за чудесное спасение сына Феодосий Великий восстановил на этом месте церковь, разрушенную при Юлиане Отступнике, а само место получило название Ватопед, что значит «куст отрока».

Прошло несколько столетий, и в середине X века на Афон прибыли три человека — Антоний, Афанасий и Николай. Они были вельможами из Адрианаполя и занялись восстановлением древнего разрушенного монастыря. Первое упоминание Ватопеда в летописных источниках датируется 985 г., а уже через десяток лет монастырь становится одной из главных обителей Святой Горы. Свое высокое положение монастырь сохранил до наших дней. За столетия своего существования Ватопед пережил годы расцвета и упадка, не раз страдал от набегов пиратов и землетрясений.
Современная история монастыря началась с 1987 года, когда группа братий Благовещенского скита, духовных чад старца Иосифа Спилеота (Иосифа Ватопедского), переселилась в монастырь, находившийся к этому моменту в упадке. Ученик старца, иеромонах Ефрем, был единогласно избран игуменом, а в монастыре начались восстановительные работы.

 

 

Невозможно перечислить все святыни, хранящиеся в Ватопедском монастыре.

 

 

Здесь и Честной Пояс Богородицы и крест императора Константина

 

 

и крест-реликварий с частицей мощей Животворящего Древа Господня и мощами святых; трость от Страстей Господних; Честные главы: свт. Григория Богослова; свт. Иоанна Златоуста и других святых,

 

 

моши святых угодников Божиих. В монастыре также находятся чудотворные иконы Пресвятой Богородицы: Виматарисса (Ктиторская), Эсфагмени (Закланная), Антифонитрия (Предвозвестительница), Элеовритисса (Елеоточивая), Пироволифисса (Простреленная), Пантанасса (Всецарица) и, наконец, Парамифия (Отрада или Утешение), чудотворный список которой находится в нашем храме.

 

 

Написана эта икона, а точнее, фреска, в XIV веке. Первоначально она находилась в правом конце внешнего притвора соборного храма. Но, после произошедшего чуда фреска была снята со стены и перенесена в особый параклис (церковь) во имя Божией Матери Отрада или Утешение. Образ этот по иконографии очень редок и в нем чудесным образом проявляется особое дерзновение Матери Божией перед Её Сыном — не только утешать нас, грешных, но и гнев Божий отвращать от нас.
Монастырь, в древности постоянно страдавший от набегов пиратов, представлял собой фортификационное сооружение. В вечерние часы ворота обители крепко запирались. Существовал обычай, согласно которому, выходя после утрени из соборного храма, насельники монастыря прикладывались к иконе Богородицы, а игумен монастыря давал ключи привратнику, чтоб тот мог отпереть ворота. И вот, 21 января (3 февраля по н.ст.) 1320 г. произошло великое чудо. По обычаю, игумен уже собирался передать ключи привратнику, но в этот момент икона Богородицы на стене ожила! Матерь Божия повелела не открывать ворота, а подняться на стены и защитить монастырь, так как ночью его осадили пираты. И — ещё одно чудо! — в этот момент Младенец Иисус, находящийся в объятиях Матери, обратился к Ней со словами: «Не надо, Мати Моя, не говори им. Пусть они получат то, что заслужили, потому что небрегут о своих монашеских обязанностях». Но, Матерь Божия отвела ручку Младенца от уст Своих, с великим материнским дерзновением уклонилась вправо и второй раз обратилась к игумену с повелением не открывать врата. И, добавив: «Смотрите, покайтесь, ибо Сын Мой гневается на вас!» — в третий раз повторила Свое предостережение.
Матерь Божия и Младенец вновь замерли на иконе, но вид её с тех пор навсегда изменился. Лик Богоматери уклоняется вправо и исполнен материнской любви, нежности и безграничного снисхождения. Рукой Своей Пречистая Дева удерживает ручку Младенца, лик Которого строг и грозен.
Перед этим образом, уже воистину нерукотворным, с тех пор всегда горит неугасимая лампада. Каждую пятницу в параклисе Отрада или Утешение совершается Божественная литургия, и каждый день служится молебен. В древности также был обычай совершать здесь монашеские постриги.
Старец Иосиф Ватопедский говорил в своей проповеди следующие слова: «…подобно тому, как Бог Отец обладает в совершенстве отеческой любовью, так что Он «Сына Своего не пощадил», но «за всех нас» предал Его, так и сейчас Дева наша Богородица, сия сподобившаяся обожения Дщерь, обладает совершенным лицом, полной степенью совершенного материнства. И ныне с дерзновением прибегаем мы к сему престолу благодати материнства и как сыновья молим Ее, матушку свою, и не может Она не услышать нас. Не может, ибо как это возможно в совершенстве материнства закрыть сердце Свое к зову и мольбам детей Своих?»
Чудотворный список иконы Богородицы «Отрада или Утешение» с 2004 года пребывает в нашем храме. В день памяти афонских святых, 13 июня, он был доставлен в Москву делегацией Ватопедского монастыря во главе с его игуменом архимандритом Ефремом.

 

 

Крестным ходом икона была торжественно перенесена в храм иконы Божией матери «Отрада и Утешение» на Ходынском поле г. Москвы. По прибытии в храм перед святым образом отслужили утреню с акафистом, а на следующий день была совершена Божественная литургия архиерейским чином в сослужении священноиноков афонского Ватопедского монастыря и московского духовенства.
С тех пор святыня постоянно пребывает в нашем храме. По свидетельству священников, от этой иконы произошло множество исцелений. Много лет уже страдающие, болящие люди получают утешение и отраду в своих скорбях, обращаясь к Матери Божией с молитвами. Так будем же всегда надеяться на Её молитвенное предстательство и заступничество перед Сыном Её и Господом нашим Иисусом Христом!


Тропарь Божией Матери пред иконой Ея Ватопедской, именуемой Отрада или Утешение

О, покров благодатный и спасительный стяжахом честную Твою икону, Богородице. На сию убо со умилением взирающе, Тебе вопием: Владычице низпосли отраду и утешение; на Тя упование возлагаем грешнии и смиреннии, на Твое предстательство надеемся недостойнии, ускори нас избавити от бед и скорбей, и умоли Сына Твоего, Христа Бога нашего, помиловати и спасти души наша.

Иной тропарь Божией Матери пред иконой Ея Ватопедской, именуемой Отрада или Утешение

глас 4

К Богородице прилежно ныне притецем,/ грешнии и смиреннии, и припадем,/ в покаянии зовуще из глубины души:/ Владычице, помози, на ны милосердовавши,/ потщися, погибаем от множества прегрешений./ Не отврати Твоя рабы тщи,/ Тя бо и едину надежду имамы.

Кондак Божией Матери пред иконой Ея Ватопедской, именуемой Отрада или Утешение

глас 8

Взбранной Воеводе победительная,/ яко избавльшеся от злых,/ благодарственная восписуем Ти, раби Твой, Богородице,/ но яко имущая державу непобедимую,/ от всяких нас бед свободи, да зовем Ти:/ Радуйся, Невесто Неневестная.

 

Молитва ко Пресвятой Богородице перед Ея иконой, именуемой «Отрада» или «Утешение»

Надежда всем концем земли, Пречистая Дево Богородице, Утешение и Отрадо наше! Не гнушайся нас грешных, на Твою бо милость уповаем. Угаси пламень греховный и покаянием ороси изсохшие сердца наша. Очисти ум наш от греховных помышлений. Приими моления от души и сердца с воздыханием Тебе приносимыя. Буди Ходатаице о нас к Сыну Твоему и Богу и отврати гнев Его от нас Матерними молитвами. Укрепи в нас веру православную, вложи в нас дух страха Божия, дух смирения, терпения и любви. Душевныя и телесныя язвы исцели, утиши бурю злых нападений вражеских. Отыми бремя грехов наших и не остави нас до конца погибнути. Подаждь нам милость Твою и святое благословение Свое всем зде предстоящим и молящимся и всегда пребываяй с нами, подавая приходящим к Тебе отраду и утешение, помощь и заступление, да славим и величаем Тя вси до последняго нашего воздыхания. Аминь.

Молитва иная

О Пресвятая Дево, Мати Господа, Царице Небесе и земли! Вонми многоболезненному воздыханию души нашея, призри с высоты святыя Твоея на нас, с верою и любовию поклоняющихся Пречистому образу Твоему. Се бо грехми погружаемии и скорбьми обуреваемии, взирая на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорбь нашу, настави на путь правый нас заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину, и на страшном суде Сына Твоего явися нам Милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.


Канон Пресвятыя Богородицы в честь иконы Ея «Отрадо» или «Утешение»

глас 8

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Божиею благодатию озари мя, Богоблагодатная, благоговейно пети пред святою иконою Твоею Тебе, необориму Заступницу и державу неразрушиму стада Твоего.

Тя, Всенепорочная, имамы предстательство, Отраду же и Утешение. Сего ради, славяще благость Твою, молимтися: помилуй нас.

Хранительница сущи Горы, нашедшим разбойником на обитель Ватопедскую не предала еси, Госпоже, рабов Твоих в руки вражия.

Кто подобен Тебе, Дево, славно творящая чудеса? Наставив бо иноки правдою Сына Твоего, еже боятися Его, избавила и утешила еси их крепостию Твоею.

Врачевско есть еже резати и жещи, здравия виновное, но Ты нас, Сыне Божий, мягкими лечбами щедрот Твоих уврачуй, Матере Твоея мольбами.

Услыши, Благая, мольбы христоименитых людей, призри на озлобление утесняемых, виждь слезы сущих в скорбех и умилосердитися потщися на рабы Твоя.

Песнь 3

Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.

Под кров Твой притекаем, людие Твои, Заступница буди нам, Владычице, подающи отраду и утешение поющим Тя.

Возвеселишася ватопедцы о спасении Твоем, Дево, немощствующих бо препоясала еси силою на прогнание разбойников.

Не престай, Всемилостивая Госпоже, спасати рабы Твоя от нечаемых напастей, да благодарственно славим Тя.

Моли, Богородительнице, еже избавитися нам всякаго гнева и прещения Божия, Тебе почитающим.

Ходатаица благоприятная и сильная к Богу, прегрешений оставление испроси нам у Него, Богоневесто.

Смертоносных недугов душевных и телесных изми ны, Владычице, вечнующую Жизнь миру рождшая.

Седален

Видимыми и невидимыми враги окружаемии, к Тебе, Дево, прибегающе, зовем: не удали помощь Твою от нас, якоже от иноков ватопедских не удалила еси, но державною силою Твоею побори борющия ны, мирное и Богоугодное житие нам устрояющи.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Убоися сердце игумена в молитве устен его от гласа Твоего, Богомати, и прещения Сына Твоего, и смятеся крепость его, возвещену бывшу нападению от разбойников.

Внегда смутитися Ватопеду во гневе Твоем, Господи, милость Твою помянул еси предстательством Приснодевы, от Неяже явился еси на спасение людей Твоих.

Не предаждь в руки врагов наследие Твое, Чистая, да некогда рекут: где есть Богородительница, на Нюже уповаша? но не вредно и ненаветно соблюди стадо Твое.

Святому образу Твоему припадающе, молим Тя: разори советы хотящих нам злая и живот наш направи творити в мире Божественную волю Сына Твоего.

Во искушениих буди нам, Владычице, спасительное прибежище, в болезнех врачевание, во обуревании тихое пристанище и в скорбех Отрада и Утешение.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго? Но обрати мя и к свету заповедей Твоих пути моя направи, молюся.

Стену тверду и столп непоколебим Тя имать Гора в нашествиих варварских: студа бо исполняеши вражия лица и возвращатися твориши им вспять тщетным и бездельным, Владычице.

Матернее промышление о сущих в Горе имущей Ти, страха ради Сына Твоего, Дево, поболе Ватопед, уведев о разбойницех, и роди дух спасения предстательством Твоим, Преблагословенная.

Яко же настоятеля Ватопедскаго, по утрени бдевша и молившася, наставила еси, Благая, како спастися от напасти, тако и нам подаждь тщание от нощи утреневати к Богу и ко спасению настави ны, избавляющи от всех бед.

Яко же запретила еси, Госпоже, отверзати врата готовой сущей погибели от врагов, тако положи в нас благодатную дверь ограждения, да не обрящется входа всезлобным губителем и их плевелом.

Яко же повелела еси, Владычице, возшедше на стены, разгнати разбойники, тако укрепи быти нам на четверостении мужества и правды, мудрости и целомудрия, да отражаем борющия ны.

Яко же умилостивила еси, Дево, Сына Твоего, прогневавшася на сущия в Ватопеде, тако умилостивляй Его о нас, во многия грехи впадающих, много бо может моление Матернее ко благосердию Владыки.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Возвещающе Ти печали наша, молимтися, Мати Божия: обвесели благодатию Твоею скорбящих сердца, всех Радосте, и от тли возведи ны.

Не стяжахом на земли иного утешения и крепкаго заступления, разве Тебе, Всеблагая, покрый убо от всякаго зла любовию воспевающих Тя.

Благостыню и милость приемлем от Сына Твоего, Дево, молитвами Твоими: от молвы бо храниши ны, смущения, ловитвы и всякаго коварства вражия, Всепетая.

Миру Спасительнице, необоримою силою Твоею не престай соблюдати стадо Твое, зовущее: Отрада и Утешение наше Ты еси, Благословенная.

Всех благих вина, смертных оживление, погибших взыскание, избави, Госпоже, рабы Твоя от напрасныя смерти и от тли греховныя возведи ны.

Кондак, глас 8

Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но яко имущая державу непобедимую, от всяких нас бед свободи, да зовем Ти: Радуйся, Невесто Неневестная.

Икос

Ангели Тя, Матерь Бога нашего, песньми славословят, и мы земнии воспеваем радостно Тебе вопиюще: радуйся, Светодавца селение, Еюже лучи спасения мирови возсияша; радуйся, Обрадованная, Еюже исполняемся Божественнаго веселия. Радуйся, двере Востока, от врат смертоносных греха нас отводящая; радуйся, светильниче пресветлый, просвещаяй омраченных. Радуйся, бездно Божия к нам человеколюбия; радуйся, цены всякия превысший дар, нам от Бога дарованный. Радуйся, яко имаши велие к Нему дерзновение; радуйся, страже Афона и тамо обитающих Хранительнице. Радуйся, всекрепкая стено, еюже сохраняемся необоримы враги христианскими; радуйся, язво невидимых врагов и от них уязвляемых врачевание. Радуйся, безсильных сило и помоще безпомощных; радуйся, Отрадо и Утешение скорбящих. Радуйся, Невесто Неневестная.

Песнь 7

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

Воплощся от утробы Твоея Господь, господствуяй тварию, и Тебе, Дево, Госпожу показа видимым же всем и невидимым, яко Матерь Свою прославляя Тя.

Согрешихом, Господи, но не отступихом от Тебе и иного не вемы, разве Тебе, не предаждь нас до конца Матере Твоея мольбами, отцев Боже благословенный.

Гора Божия осененная, Всечистая, покрый сущия в Горе сению Твоих молитв и от сети ловящих избави поющия: отец наших Боже, благословен еси.

Непобедимая еси крепость, Госпоже, и несокрушимое ограждение с верою призывающих Тя: разрушаеши бо советы вооружающихся на славящия Тебе.

Унывающим Отрадо, печальным Утешение, заблуждающим Наставнице, соблюди нас, Дево, от всякаго зла, чтущих святый образ Твой.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Преблагословенная Мати Всещедраго Бога, ущедри ны, недостойныя, дарами милосердия Твоего, да превозносим Тя во веки.

Крепость и держава буди рабом Твоим, Всецарице, сила, оружие и меч, враги спасения секущий, да славим Тя во веки.

Сияющая паче Ангел святынею, храни нас, Всенепорочная, от греховных деяний, глаголаний и помышлений, да благословляем Тя во веки.

Освяти, Всесвятая, благоговейно лобызающих святую икону Твою и Твоим Матерним дерзновением милостива нам твори Сына Твоего , да поем Его во веки.

Отрадо и Утешение молящихся Тебе, временных и вечных лютых избави ны, да хвалим Тя и Сына Твоего превозносим во вся веки.

Путь и Живот, Дево, рождшая, стопы наша направи по словеси Божию, да, живот вечный наследовавше, поем Тя, Сына Твоего превозносяще во вся веки.

Песнь 9

Ирмос: Проявленное на горе законоположнику во огни и купине Рождество Приснодевы в наше, верных, спасение песньми немолчными величаем.

Веселися, Ватопеде, неусыпная бо Афона Назирательница яже на Тя коварство вражие манием Своим разруши и изгнанны сотвори разрушение Тебе уготовавшия.

О, великаго дерзновения Твоего, Дево, к Богу и благоутробия к рабом Твоим! Возвещающи бо о вразех, уклонила еси лице Свое от руки Сына Твоего, якоже до ныне зришися на иконе Твоей.

Поток светлости, отрады и утешения неистощимый Ты еси, Богорадованная Мати Света, тьму убо страстей прожени от нас, обстоящих светлое подобие лица Твоего, и несветимаго огня избави.

Спасение буди присное, Госпоже, от враг наших и из руки всех, ненавидящих нас, и направи ноги наша на путь мирен милосердия ради милости Сына Твоего и Бога нашего, Преблагословенная.

Владычествующая всеми яко Всецаря Матерь, стране нашей подаждь благоденствие, мир, спасение и на сопостаты победы и одоление.

Молебное пение от души принесох со страхом Тебе, Дево, рождшей Христа Бога, Егоже молящи, благоприятна сотвори моления наша, да Тя песньми немолчными величаем.

Светилен

Озаряеми благодатным светом от иконы Твоея, Владычице, благоговейно зовем Ти: радуйся, светозарная луно, в нощи греха сущих путеводящая к свету покаяния; радуйся, Мати Избавителя, избавляющая нас от напастей нечаемых. Радуйся, Отрадо и Утешение душ наших.


Акафист Пресвятой Богородице перед Ея иконой, именуемой «Отрада», или «Утешение»

Кондак 1

Взбранной Воеводе Победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую от всяких нас бед и скорбей свободи, да зовем Ти:
Радуйся, Радосте наша, отраду и утешение верным дарующая.

Икос 1

Ангел множество и вся небесныя воинства славят Тебе, Матерь всех Богородицу, яко источаеши радости и утешения сердцам человеков в скорби обретающихся. Тем же и мы печальми обремененнии, надежду спасения в Тебе улучивши, умиленно взываем:
Радуйся, материнское к нам грешным благоволение;
Радуйся, прибегающих к Тебе крепкое заступление.
Радуйся, Божественный благости Подательнице;
Радуйся, христианского рода Заступление.
Радуйся, яко Тебе вся колена земная Материю Божиею исповедуют;
Радуйся, яко Твоими молитвами скорби наша утишаются.
Радуйся, Твоим ходатайством прошения благая наша исполняются;
Радуйся, благодать и милость иконами Твоими нам являющая.
Радуйся, мир от потопа греховнаго спасающая;
Радуйся, яко молящиеся Тебе от всякаго зла сохраняются.
Радуйся, яко Твои честныя иконы чудесами прославляются;
Радуйся, Радосте наша, отраду и утешение верным дарующая.

Кондак 2

Видя чудес множество от честных икон Твоих изливающееся, яко Ты еси молящихся Благая Помощнице, обидимых Заступнице, ненадеющихся Надеждо, скорбных Отрада и Утешение, болящих исцеление, труждающихся помоще, благодарственно вопием о Тебе Богу: Аллилуиа.

Икос 2

Разум подаждь нам, Всеусердная Предстательнице наша, в находящих на нас лютых скорбех к Тебе прибегати, утешения ищущи. Ты же яко Благая, не остави нас во всякой требуемой нам помощи, да таковую получивше взываем Тебе радостно:
Радуйся, обуреваемых тихое пристанище;
Радуйся, сомневающихся известное утверждение.
Радуйся, скорая Помощнице в скорбех и напастех;
Радуйся, теплая Заступнице во всяких обстояниях.
Радуйся, печали наша Твоим утешением умоляющая;
Радуйся, скорбями грехи наша очищающая.
Радуйся, в страданиях наших утешение нам подавающая;
Радуйся, от внезапныя смерти без покаяния молящихся Тебе избавляющая.
Радуйся, от враг видимых и невидимых нас охраняющая;
Радуйся, от нападения злых человек спасающая.
Радуйся, во всяких нуждах прибегающим к Тебе помогающая;
Радуйся, Радосте наша, отраду и утешение верным дарующая.

Кондак 3

Силою свыше укрепи нас, Благая Владычице, к Твоему заступлению с верою притекающих и Твоего посещения и промышления сподоби, мрак уныния и скорбей облегших нас отгоняя, да спасаеми Тобою вопием Богу: Аллилуиа.

Икос 3

Имущи богатство милосердия неизреченное, всем просящим руку помощи простираеши, недуги врачуя, скорби утоляя, страсти угашая. Не презри нас, Благая Владычице, в печалях и скорбех наших к Тебе притекающих и вопиющих:
Радуйся, Единая всех Мати, милосердие нам являющая;
Радуйся, милости Своей сокровищницу всем открывающая.
Радуйся, родителей скорбящих о чадах своих заблудших печаль утоляющая;
Радуйся, вдовствующих подкрепляющая.
Радуйся, сиротствующих добре устрояющая;
Радуйся, всех скорбящих утешение.
Радуйся, отчаявающихся едина Надеждо;
Радуйся, изнемогающих от уныния Заступнице и подкрепление.
Радуйся, болящих телом и душею благонадежное посещение;
Радуйся, различными недугами одержимых премудре уврачевание.
Радуйся, яко Тобою по мере веры подается совершенное исцеление немоществующим;
Радуйся, Радосте наша, отраду и утешение верным дарующая.

Кондак 4

Буря многих бед и напастей содержит нас и волнения их в мире терпим. Ты же, яко Милостивая Мати Спаса нашего Господа, воздвигни руце к Сыну Твоему, да призрит на лютыя сердец наших и исхитит нас из пучины отчаяния, вопиющих Ему: Аллилуиа.

Икос 4

Слышащи, Пресвятая Дево и Мати, яко являла и являеши многую милость роду христианскому, не оставляй нас во дни скорби и напасти и избавление от сих даруй, молим Тя: храни и заступи всех нас от всякия беды и печали, да в мире воспеваем Ти сице:
Радуйся, Заступнице наша, Твоим всемощным заступлением от всякия нужды нас избавляющая;
Радуйся, усердное моление ко Господу о нас приносящая.
Радуйся, Своим предстательством праведный гнев Божий утоляющая;
Радуйся, на милость Его к нам приклоняющая.
Радуйся, Твоею помощию уповающих на Тя не оставляющая;
Радуйся, добре подвизающихся укрепляющая.
Радуйся, на благое и душеполезное нас наставляющая;
Радуйся, души обремененныя заботами житейскими к попечению духовному направляющая.
Радуйся, всех верных благое мздовоздание;
Радуйся, в забвении долга и чести живущих правосудное наказание.
Радуйся, в пленении, во узах сущих подкрепление и возвращение;
Радуйся, Радосте наша, отраду и утешение верным дарующая.

Кондак 5

Богосветлые чины ангельския славят Тебе, яко Матерь всех и Богородицу. Мы же Тебе, Заступнице нашей, поклоняющеся, умиленное благоволение приносим и уповающи на Твою милость смиренно молим Тя: милостива пребуди к нам, Владычице, и избави нас от бед и скорбей, да всегда прославляем Твое милосердие зовуще Богу: Аллилуиа.

Икос 5

Видеша силы небесныя, яко Твоею молитвою гнев Божий утоляется, прославляют и величают Твое милосердие. Мы же грешнии на земли зряще Тебе, изображенную Пречистую Богоматерь, умиленно взываем:
Радуйся, Матерь рода христианского, милосердие нам являющая;
Радуйся, у Престола Сына Твоего непрестанно о христианах молящаяся.
Радуйся, любовию Своею грехи наши покрывающая;
Радуйся, Твоею милостию нас заступающая.
Радуйся, источник отрады и утешения всем источающая;
Радуйся, от междоусобия и распри нас охраняющая.
Радуйся, вражду и ненависть миром и любовию утоляющая;
Радуйся, скорбь и смущение сердец наших умиляющая.
Радуйся, гневливостью одержимых вразумляющая;
Радуйся, в мире со всеми живущих Отрада и Утешение.
Радуйся, суетная прелести мира сего презирати нас научающая;
Радуйся, Радосте наша, отраду и утешение верным дарующая.

Кондак 6

Проповедуют милости и чудеса Твоя, Богомати, вси люди православнии, ибо честным Своим покровом охраняеши весь род христианский. Тем же вопием Ти: избави Твоими молитвами всех нас от бед и напастей, да воспоим вси Богу: Аллилуиа.

Икос 6

Возсия благодать светозарная от пречудных икон Твоих, Богомати, пред ними мы припадающе молим Тя: отгони облак нашедших на нас искушений, да вопием Ти:
Радуйся, честныя иконы Твоя чудесами прославляющая;
Радуйся, молящимся пред сими иконами с верою прошения исполняющая.
Радуйся, в бедах сущих заступающая;
Радуйся, уповающим на Тя спасение подающая.
Радуйся, Предстательница пред Богом, за всех нас молящаяся;
Радуйся, Заступнице рода христианского, от Бога нам дарованная.
Радуйся, яко Ты еси храмов наших первейшее украшение;
Радуйся, домов христианских благословение.
Радуйся, православных людей Покров и Заступление;
Радуйся, всего мира очищение.
Радуйся, вся благополезны просящим у Тебе дарующая;
Радуйся, Радосте наша, отраду и утешение верным дарующая.

Кондак 7

Хотящи явити милосердия Своего бездну повелела, Пречистая, игумену обители Ватопедския на Афоне врат обители их не отверзати, да избегнут Твоим ходатайством по суду Божию предстоявшего нападения вражескаго и тако избавльшеся милостию Твоею беды и напасти вси иноцы воспеша Богу: Аллилуиа.

Икос 7

Дивное чудо явила, Богомати, инокам спасение, от святыя иконы Своея изрекла еси, но и зрак лика Твоего Пречистаго Сына сущии на иконе изменила еси. Сего ради видевше чудо сие велие и преславное вси люди возопиша Ти:
Радуйся, святыя иконы Своя на земли во спасение всем явити благоизволившая;
Радуйся, иконами Своими милосердное нам заступление являющая.
Радуйся, чрез святыя изображения Твоя чудеса и ныне источающая;
Радуйся, ими наша скорби и печали утоляющая.
Радуйся, яко на икону Твою взирающе Тебе Самой поклоняемся;
Радуйся, Твоим милостивым заступлением мы грешнии спасаемся.
Радуйся, Твоими святыми иконами град наш освятившая;
Радуйся, теми сердца верующих возвеселившая.
Радуйся, грады и веси Российския Своими чудотворными иконами от разорения спасшая;
Радуйся, страну нашу от порабощения избавлявшая.
Радуйся, утешением и радостию молящихся пред Твоею честною иконою возвеселяющая;
Радуйся, Радосте наша, отраду и утешение верным дарующая.

Кондак 8

Странники и пришельцы на земли вси есмы, по глаголу Апостолову: беды от врагов, скорби от близких, печали от лжебратии и сродник терпяще, в лишениях многих. Ты же, Владычице, яко Милостивая Утешительнице, настави нас к тихому пристанищу и моли Сына Твоего утешение и радости нам даровати, да всегда вопием Ему: Аллилуиа.

Икос 8

Все житие наше на земли болезненно и печали бывает причастно: слава не стоит, богатство мимо течет, друзи и искреннии смертию отъемлются, немоществует тело, изнемогает и дух наш. К Тебе убо прибегаем, о Богомати, пред Пречистою иконою Твоею припадающе, исполни радости и утешения скорбное сердце наше, да вопием Ти:
Радуйся, всех к Тебе прибегающих милостию Своею покрывающая;
Радуйся, Милостивая, и нас милующая.
Радуйся, Домостроительнице, жизнь нашу добре устрояющая;
Радуйся, отрадою и утешением печали наши утоляющая.
Радуйся, с Сыном Твоим и Богом вечно царствующая;
Радуйся, Ему о нас моления всегда приносящая.
Радуйся, жестокость сердца нашего умягчающая;
Радуйся, отчаявшихся надеждою возвеселяющая.
Радуйся, Твоим заступлением враждующия на нас отводящая;
Радуйся, от козней духа злобы нас спасающая.
Радуйся, верующим противу диавола силу и мужество подающая;
Радуйся, Радосте наша, отраду и утешение верным дарующая.

Кондак 9

Всякое естество ангельское виде Тя, Богомати, у Престола Сына Твоего, предстоящую и за вся христианы молящуюся, восхваляет Тя, яко сильным Своим предстательством грешных заступаеши, прибегающих к Тебе от бед избавляеши, печали наша отрадою утоляеши и молишися о всех верою зовущих: Аллилуиа.

Икос 9

Витийство человеческое не возможет по достоянию восхвалити Тя, Пресвятая Богородице, и воспети неисчетныя чудеса Твоя, ими же нас просвещаеши. Мы же Твои благодеяния ведающе, душею радующеся Тебе глаголем:
Радуйся, от напастей Твоим предстательством нас защищающая;
Радуйся, от всяких бед Своим ходатайством нас изимающая.
Радуйся, от належащего праведнаго прещения Божия Твоим умилением нас освобождающая;
Радуйся, от нашествия вражия нас спасающая.
Радуйся, от домашния вражды и брани единокровных миром ограждающая;
Радуйся, от смертоносныя язвы прибегающих к Тебе с несумненную верою исцеляющая.
Радуйся, правосудие Божие умилостивляющая;
Радуйся, страны нашея православныя Защитнице.
Радуйся, всех верующих Благая Заступнице;
Радуйся, всех труждающихся помощь и укрепление.
Радуйся, теплая за всех нас Предстательнице;
Радуйся, Радосте наша, отраду и утешение верным дарующая.

Кондак 10

Спасти хотя род человеческий от вечныя муки и прелести вражия Человеколюбец Господь Тебе, Матерь Свою, дарова земным во отраду и утешение, да будеши обидимым Заступнице, отчаявающимся Надеждо, скорбящим радование, печальным утешение и всех в нуждах и напастех к Тебе прибегающих спасаеши вопиющих верно: Аллилуиа.

Икос 10

Стена еси и заступление всем с верою и любовию притекающим к Тебе, Пречистая Владычице, тем же молим Тя: заступи и покрый и огради всех сирых и безпомощных нас от искушений, озлоблений и бед с любовию взывающим:
Радуйся, Мати Божия, любовию материнскою нас возлюбившая;
Радуйся, яко Твоя материнская молитва много может, Владыку умилостивляющая.
Радуйся, Милосердная, двери милосердия Божия нам отверзающая;
Радуйся, к делам милосердия нас возбуждающая.
Радуйся, Святыя Заповеди исполняти нас научающая;
Радуйся, любити своего ближняго нас наставляющая.
Радуйся, грешники к покаянию призывающая;
Радуйся, находящий на нас облак печалей и скорбей разсеявающая.
Радуйся, пламень страстей наших угасающая;
Радуйся, мрак искушений изгоняющая.
Радуйся, Твоим к Богу прошением вся полезная нам подающая;
Радуйся, Радосте наша, отраду и утешение верным дарующая.

Кондак 11

Пение всеумиленное приносим Ти раби Твои, Богородице, яко всесильней Заступнице рода христианского: к Тебе бо в напастех и скорбех прибегаем и пред Тобою в бедах наших слезы проливаем, поюще Богу: Аллилуиа.

Икос 11

Светозарно сияют иконы Твои святыя, проявленныя на освящение наше и утешение. Мы же с любовию чтуще их с верою припадаем пред ними и вопием Ти:
Радуйся, Мати Бога Истиннаго, благочестивыя души просвещающая;
Радуйся, Утешительница наша, обремененныя сердца умиряющая.
Радуйся, всем Тебя призывающим руку помощи простирающая;
Радуйся, Тебе Материю Божией именующим и почитающим нам непрестанно помогающая.
Радуйся, уповающим на Тя и в вере живущим непостыдный конец живота подающая;
Радуйся, во внезапных бедах на нас находящих подкрепляющая.
Радуйся, от насилия и от внезапныя смерти охраняющая;
Радуйся, от татей ограждающая.
Радуйся, в сердцах наших зависть и небратолюбие искореняющая;
Радуйся, от наветов, клеветы и поношений защищающая.
Радуйся, отступающих от веры и церкви вразумляющая и на путь правый возвращающая;
Радуйся, Радосте наша, отраду и утешение верным дарующая.

Кондак 12

Благодать Божественную испроси нам у Сына Твоего, Пречистая Богородительнице, и простри руку помощи, покрый нас кровом крилу Твоею, избави от облежащия беды и напастей, отгони от нас всякаго врага, и супостата, умири нашу жизнь, Владычице, и в печалех бедствующим помози, да спасаеми Тобою воспеваем Богу: Аллилуиа.

Икос 12

Поюще Твои милости и чудеса, Богородительнице, хвалим Тя вси, яко твердую Предстательницу нашу, веруем и надеемся, яко испросиши, Благая, временная и вечная всем воспевающим Тя сице:
Радуйся, непостыдное наше Упование в животе и по представлении нашем;
Радуйся, уповающим на Тя в мире конец живота подающая.
Радуйся, всех искренне верующих благословляющая;
Радуйся, маловерных и суеверных вразумляющая.
Радуйся, непочитающих икон Твоих святых наказующая;
Радуйся, поклоняющимся иконам Твоим и Тя на помощь призывающим помогающая.
Радуйся, гордостию ума одержимых и от святыя Церкви отходящих смиряющая;
Радуйся, благами мира сего прельщающихся и попечение сугубое о них имущих светом блага истиннаго озаряющая.
Радуйся, в юности доброму и чистому житию Наставнице;
Радуйся, в старости от сердечнаго окаменения Охранительнице.
Радуйся, Радосте наша, отраду и утешение верным дарующая.

Кондак 13

О, Всепетая и Всемилостивая Мати, Пречистая Госпоже Богородице! Услыши глас молящихся рабов Твоих и приемши сие малое моление наше, избави нас от всяких бед, скорбей и напастей: подаждь нам в жизни руку помощи, враги наша разжени, недуги наша исцели, всякую злобу и вражду отжени от нас, в печалех житейских отраду и утешение даруй и будущия изми муки о Тебе вопиющих: Аллилуиа, аллилуиа, аллилуиа.

Этот кондак читается трижды, затем икос 1-й и кондак 1-й


Пресвятая Богородице, спаси нас!

 


Список использованных материалов:

http://blagosloven.ru
http://www.pravenc.ru
http://azbyka.ru
http://www.pravoslavie.ru
http://www.pemptousia.ru
http://father-ingwar.livejournal.com

Фотографии:

http://agioritikesmnimes.blogspot.ru фотоснимок иконы Богородицы Отрада и Утешение
http://father-ingwar.livejournal.com
(фотографии Святой Горы и Ватопедского монастыря любезно предоставлены протоиереем Игорем Пчелинцевым)

Back To Top
×Close search
Поиск